Entrá teksto sin tekla

Resumen

E luna aki mi a risibí un pida di tecnologia wearable special pa purba: e Tap Strap. Karga riba bo dede, e Tap Strap ta rekonosé ora bo ta tap i move. Ku dje bo por kontrolá bo kompiuter i skirbi riba dje sin mouse òf teklado!

Teksto kompleto

E Tap Strap ta konektá ku kualkier kompiuter, tablèt òf telefòn via Bluetooth, manera kualkier teklado òf mouse. No tin mester di driver òf software special, apart di siña kon pa usa e Tap Strap. Bo ta bisti e strap ora bo pasa bo dede dor di anèlnan ku tin sensor riba nan. E sensornan ta traha huntu pa rekonosé tap i movementu. E ta pisa hopi poko i bo piel por rospira ku fasilidat dor di e tela elástiko.

Mi no a tin problema pa e Tap Strap traha ku mi iPad Pro. Ku apps special di Tap Strap bo por siña usa Tap Strap òf wega ku dje. E aparato mes no ta duna feedback ni instrukshon kon pa usa e, pesei mi a eksperiensiá un kurva di siñansa masha pará, ku a obligá mi memorisá diferente ‘ritmo’ i ‘akòrdi’.

Manera siña toka piano òf gitara, bo por bira bon na dje. Mi a lesa historia di hende ku a logra skirbi lihé ku Tap, kapas di skirbi 20-30 palabra pa minüt. Tap Strap ta pone e potensial riba bo dede, literal.

Komo hende ku sa skirbi ku tur dede, mi lo no kambia mi teklado pa nada: esei lo hasi añanan di eksperiensia i entrenamentu inútil. Mas bien, mi ta mira e potensial di Tap Strap komo algu otro ku un teklado òf mouse. Usa e den realidat aumentá i virtual ta parse natural, pasobra e por digitalisá e movementunan di bo dede, te ku un tap mansu.

Konklushon

Tekladonan konvenshonal ta existí pa desenionan, i miniaturisashon moderno di teknologia ta pèrmití nan wòrdu aumentá, òf mes remplasá, pa teknologia wearable.

Tap Strap ta ilustrá e kambio aki den teknologia na un manera elegante i bunita. Bisti e tipo di teknologia aki ta pèrmití bo skirbi i kontrolá hopi mas leu ku e habitat natural di teklado i mouse. Esei ta e tekla pa tuma ku bo for di e artíkulo aki (e wega di palabra ta ku intenshon).