Desèñá mi mes relòshi

Resumen

Luna pasá un pakete masha spesial a yega for di Suisa, ku mi relòshi di pols traha riba pedido. Mi a disidí pa vende tur mi relòshi di marka grandi i reemplasá nan ku algu úniko, hasi segun mi gustu personal. Esaki ta e storia di mi relòshi.

Teksto kompleto

Relòshinan

Tin algu mágiko den e mákinanan miniaturo aki ku ta sinta riba pols di hende: relòshinan. Nan ta maravia tékniko ku hopi biaha ta hopi mas ku un simpel instrumento pa mira ki ora ta.

Algun ta símbolo di statüs, algun ta obra di arte, algun ta herment di fitness i otronan ta kompañero digital. Pero mas ku tur, un relòshi ta algu di bèrdat personal: bo ta usa e riba bo kurpa. Ku smartphone i kompiuter pa tur kaminda, niun hende no tin mester di bèrdat di un relòshi pa sa ki ora ta. Usa un relòshi ta un desishon deliberá, un ku mi ke considerá ku kuidou.

Durante e añanan mi a usa hopi relòshi diferente i kada un tin su mes storia i motibu. Ainda niun di nan no a sinti manera un ahustamentu perfekto pa mi.

Bo lo keda sorprendé kon difísil ta pa definí presis kiko bo ke di bèrdat. Mi a tuma mi tempu (e wega di palabra ta intenshonal) pa destilá un lista di karakterístikanan ku lo definí mi relòshi perfekto:

• display analógiko: manera tempu ta pasa natural, mi gusta wak e wisernan di e relòshi mové sin stòp segun ku tempu ta avansá
• simpel: sin ningun distrakshon inesesario, mi ke ku mi relòshi ta konsentrá (pa wak) riba su funshon
• outónomo: konforme ku kon mi ta balorá mi mes independensia, mi ke ku mi relòshi por kore su so, sin mester di kargá of di duna kuerda ku man
• na pruba di awa: pasobra mi no ta tin miedu di awaseru ora mi ta pidal ku mi bisikleta i pasobra mi gusta nada, mi relòshi mester por ku awa tambe!
• dia i anochi: ku un yu chikí, e diferensia entre anochi i dia ta bira difuso di bes en kuando.., kualkier orientashon ku e relòshi por duna den skuridat total ta bon risibí!
• sin tempu: den un mundu kaminda kosnan ta bira obsoleto lihé, mi gusta pensa riba mi relòshi manera algu mas sin tempu, manera un obra di arte
• diskreto: mi ta usa mi relòshi pa mi mes, mi no ke ku e yama atenshon inesesario
• onesto: e mester ta fiel na e naturalesa di e material, mi no ke skonde kosnan tras di kapa di dekorashon superfisial

ochs und junior

Anto mi a topa ochs und junior, un kompañia chikí di relòshi for di Suisa. Fundá na 2006 pa Ludwig Oechslin, Beat Weinmann i Kurt König, nan a pasa pa un proseso intenso di konstrukshon i desèño pa krea nan relòshinan. Miéntras e kompañia awor ta den un estado di transformashon, nan ainda ta produsí e relòshinan ku a gana nan reputashon.

Nan relòshinan di pols ta usa menos pida pa entregá komplikashon mekániko, ku ta mustra otro kosnan ademas di tempu apénas. Ludwig Oechslin, un trahadó di relòshi, inventor i desèñadó renombrá, rekonosé i premiá, a desèñá e relòshinan. E a bira konosí pa su restorashon di e relòshi astronómiko den Biblioteka di Vatikano, konosí komo e Relòshi Farnese, i pa e tempu ku e a pasa komo Direktor di e Museo Internashonal di Orologia na La Chaux-de-Fonds, Suisa. E ta obsesioná ku redusí e kantidat di pida, pasobra mekániko mas simpel ta mas konfiabel i mas fásil pa fabrikká i mantené.

Esaki di eliminá kompleksidat inesesario ta algu ku mi ta balorá di tur kurason. Ta algu ku mi ta purba logra den tur kos ku mi hasi, desèñá i traha ku. Manera mi kòfi botòn of mi bisikleta di kurida. Mi a sa na instante ku esaki tabata e kompañia ku por a traha mi relòshi.

Despues di kontaktá e kompañia, nos a tin hopi yamada telefóniko i kambio di email pa diskutí mi idea. Durante e añanan nan a traha algun ehèmpel masha spektakular, ainda mi tabata ke keda fiel na mi lista di deseo. Ora shelu ta e limite, ta difísil pa keda riba tera, ainda esei ta loke mi a purba hasi ora mi a krea e obra di arte diskreto aki.

Mi relòshi ta traha di titanio (ku ta lihé i durabel), e ta chikí (diámetro di 36MM), e ta na pruba di awa (ku un korona ku ta rosk), e wisernan ta lumínoso (visibel den skuridat), e tin un movimentu outomátiko (ku no tin mester di bateria ni di duna kuerda ku man) i su kolornan ta fiel na e material (no tin superfisie pintá).

E relòshi ta un asina yamá “kalender anual”, loke ta nifiká ku e por mustra e fecha korekto ku un so ahustamentu manual pa aña (durante febrüari). Un kalender anual “sa” e diferensia entre lunanan kòrtiku i lunanan mas largu. Den haute horlogerie esaki ta un komplikashon di nivel haltu, di bes en kuando ku mester di mas ku shen pida adishonal. Danki na e desèño brilante di Oechslin, e relòshi aki ta usa so 3 pida adishonal!

Komo un luho skondí (so esun ku ta usa e relòshi ta nota esaki), e relòshi ta traha mas lihé dor di fresa afó tur material di mas. Miéntras algun hende ta prefer un sierto pisá pa komunik balor (material), mi ta apresiá lihesa pasobra e ta mehorá komodidat (mas ainda ora bo ta aktivo).

Durante e proseso di desèño mi a keda den kontakto ku e kompañia. Di bes en kuando mi tabata risibí imágen for di e taller, pa mi keda informá di kon e kosnan tabata avansá.

Dia di entrega!

Despues di warda ku pasenshi pa algun luna, mi a risibí mi relòshi pa korreo luna pasá. Normal bo ta bon bini pa bai buskele bo mes, pero pa motibu di tur e restrikshonnan di COVID-19 mi a skohe pa entrega pa pakete. Si bo no gusta paga impuesto (di importashon), bo por ke rekonsiderá esaki... e oficina di aduana hulandes a ke su parti di mi plaka promé ku e a laga mi pakete drenta.

Konklushon

Ainda ku tin hopi motibu pa skohe un relòshi, mi tabata ke ku mi relòshi ta perfekto pa mi. Den un mundu ku ta move lihé, kaminda kosnan ta wòrdu reemplasá lihé pa moda nobo, pasa tempu i plaka riba un relòshi sin tempu a sinti korekto.

No tin miedu di tuma desishon pa bo mes. Usa e relòshi ku bo ke usa. Si e no ta existí, no entra den pánico. Danki na e maravianan di nos mundu konektá, bo por haña hende ku lo yuda bo!